Pućowanska wustajeńca wo mjeńšinach w Němskej w Kielu wotewrjena

Kiel (SN). Pućowansku wustajeńcu mjeńšinoweje rady „Was heißt hier Minderheit“ su minjenu srjedu w krajnym sejmje Schleswigsko-Holsteinskeje w Kielu wotewrěli. Předsydka krajneho sejma Kristina Herbst spřistupni ju w přitomnosći wjace hač 120 wobdźělnikow, mjez nimi mnoho zastupjerjow knježerstwa a krajneho sejma. Jednaćelka Domowiny Judit Šołćina zastupowaše w podijowej diskusiji Serbow. Štwórtk na to přewjedźechu posedźenje mjeńšinoweje rady w rumnosćach krajneho sejma Schleswigsko-Holsteinskeje. Mjez druhim mějachu čłonojo rady składnosć so ze społnomócnjenym za mjeńšiny w najsewjernišim kraju Němskeje Johannesom Callsenom rozmołwjeć (SN informowachu). Wón poradźuje mjez druhim tamnišeho ministerskeho prezidenta w prašenjach Danow, Frizow, němskich Sinti a Romow kaž tež Němcow z Danskeje. Z nowej legislaturnej periodu je tuta funkcija hłownohamtska. Społnomócnjeny je njewotwisny a dźěła frakcije přesahujo kaž tež ze wšěmi ministerstwami knježerstwa hromadźe.