Sakske knježerstwo so wčera w Serbskim domje schadźowało, ministerka Klepsch w redakciji SN

Budyšin (SN/MkWj/at). Sakske krajne knježerstwo je wčera mjeztym šestu rozprawu wo połoženju serbskeho ludu na kabinetnym posedźenju, kotrež je so w Budyskim Serbskim domje wotměło, wobjednało. Kaž to sakski Serbski zakoń předwidźi, přepodadźa rozprawu nětko krajnemu sejmej. Zdźěłali su dokument pod nawodom Sakskeho statneho ministerstwa za wědomosć, kulturu a turizm, kotrež je za naležnosće Serbow zamołwite. Nimo sakskich statnych ministerstwow su na njej sobuskutkowali Rada za serbske naležnosće, Domowina, Załožba za serbski lud kaž tež Ewangelski běrow Sakska a Katolski běrow Sakska. Zaměr rozprawy je, Sakski krajny sejm wo wobsahach informować, kotrež žiwjenje serbskeho ludu w Swobodnym staće nastupaja. Po wustawje ma knježerstwo rozprawu wo połoženju Serbow jónu w kóždej wólbnej dobje předpołožić.