Napjate połoženje tež w Sakskej – dotal žane dźěćo wotpokazali njejsu

Drježdźany/Lipsk (dpa/SN). Žołma infekcijow, potrjechjace system dychanja dźěći w starobje hač do 15 lět chorownje po cyłej Sakskej chětro starosća. „Tak zlě, kaž w Bayerskej, Sewjerorynsko-Westfalskej abo Berlinje, drje hišće njeje“, zdźěli direktor dźěćaceje chorownje Drježdźanskeho uniwersitneho klinikuma Reinhard Berner. Ale po cyłym kraju zwěsćeja praksy a nuzowe přijimarnje přiběracu ličbu. Kaž šef Lipšćanskeho klinikuma Wieland Kiess wuswětli, to hišće katastrofa njeje. „Tola smy w krizowym ­modusu.“

Předewšěm padow influency a strašneho rezpiratoriskeho syncytialneho-wirusa (RSV) dla je so połoženje na dźě­ćacych stacijach hišće raz přiwótřiło. ­Nazymnjenje drje w zymje njeje wulka překwapjenka. Tola pandemija korony je so na imunitu dźěći wuskutkowała. Tak je wužiwanje nahubnika a desinficěrowanje k tomu dowjedło, zo njemóžachu so wiry wulce rozpřestrěwać. Dźěći njemóžachu imunitny system wuwiwać. Ćim bóle jich to nětko trjechi.