Drježdźany (dpa/SN). 9eurowski tiket je w Sakskej k tomu wjedł, zo bě mjenje přepytowanskich jednanjow jězdźenja bjez jězdźenki dla. Po informacijach sakskeho justicneho ministerstwa registrowachu statne rěčnistwa w měsacach juniju, juliju a awgusće cyłkownje 264 nowych jednanjow. Loni bě jich w samsnym času 2 754 padow. Sakska justicna ministerka Katja Meier (Zeleni) sej žada, zo njeměło so jězdźenje bjez jězdźenki hižo tak kriminalizować. „Je načasu, jězdźenje bjez jězdźenki z chłostanskeho zakonika šmórnyć. Naše ličby k tiketej pokazuja, zo niske jězbne płaćizny ličbu chłostanskich jednanjow pomjeńšeja“, Meier rozłoži. Tak njetrjebaja sudnistwa hižo telko padow wobdźěłać.