Hospodarski minister chce zmilinjowanje brunicy prjedy skónčić

Berlin (dpa/SN). Zwjazkowy hospodarski minister Robert Habeck (Zeleni) je so za to wuprajił, na wuchodźe Němskeje z wudobywanjom brunicy zašo přestać. Tak ma wón lěto 2030 za realistiske, za čož su wotpowědne dojednanja trěbne. „To njerozsudźa jednotliwcy, ale šěroka alianca dyrbi za tym stać“, Habeck zwurazni. Za plan ma zmysłapołne argumenty. Kaž zakoń dotal předwidźi, maja so poslednje bloki milinarnjow w Němskej 2038 zawrěć. To su bloki wobhospodarjerja Łužiska energija a milinarnje (LEAG).

Dale hospodarski minister rozłoži, zo chce towaršnosć w Sewjerorynsko-Westfalskej dočasnje přestać brunicu wudobywać. „To njerěka, zo budu wšitcy sobu činić, ale politika so na to měri. Na wuchodźe Němskeje su ludźo bóle skeptiscy. Potom dyrbimy wotwažować, hač je tajke dojednanje móžne.“ Brunicowe kraje na wuchodźe Němskeje su Braniborska, Sakska a Saksko-Anhaltska.