Lipsk (dpa/SN). Sakski politikar Lěwicy Sören Pellmann widźi hladajo na sylnje přiběracu chudobu w starobje tež w Sakskej nuznu potrjebu jednanja. „20 procentow wjace starobneje chudoby w běhu jednoho lěta je alarmowace“, rjekny Lipšćanski zapósłanc zwjazkoweho sejma powěsćerni dpa. Tak přijimowaše loni w juniju 14 510 ludźi w Sakskej w rentnarskej starobje zakładne zawěsćenje, 2220 wjace hač lěto do toho. Po Pellmannu je to najwjetša ličba, kotruž je zakładne zawěsćenje w starobje dotal docpěło. Wón widźi přičinu wuwića tež w tym, zo starši ćěkancy z Ukrainy próstwu wo zakładne zawěsćenje w starobje zapodadźa. Bytostna přičina pak leži w inflaciji a stupacych płaćiznach za žiwidła a energiju. „Ampla dyrbi jasnje wjace za rentnarki a rentnarjow činić. Trjebamy wobaranski škit přećiwo starobnej chudobje“, žadaše sej politikar. Wupłaćena energijowa pawšala wot 300 eurow njedosaha. Trjebamy wulku rentowu reformu w Němskej a rentowu kasu kaž w Awstriskej.