Kontrowersnu debatu do wólbow senata w Berlinje wotměli

Berlin (dpa/SN). Tři dny do wospjetnych wólbow njedźelu w Berlinje je opozicija posedźenje Berlinskeho parlamenta za to wužiwała, zo by koaliciju SPD, Lěwicy a Zelenych kritizowała. Berlinska knježaca měšćanostka Franziska Giffey (SPD) pak skedźbni předewšěm na wuspěchi a poda perspektiwy do přichoda.

Načolny kandidat CDU Kai Wegner jej wumjetowaše, zo Giffey połoženje města we wólbnym boju jako jara wuspěšne rysuje. Tomu pak scyła tak njeje. W zwjazkowym kraju maja jara wjele bjezdźěłnych. Je to druha najhubjeńša kwota ­po cyłej Němskej. Jenož w Bremenje je situacija hišće špatniša. Dale opozicija kritizowaše, zo njejsu w Berlinje ani kmani, demokratiske wólby přewjesć. Nastupajo inflaciju čaka Berlinski senat na rozsudy Zwjazka a scyła njereaguje. Město toho pak zwyši popłatki za smjeće a parkowanje. Frakciska šefina AfD Kristin Brinker so kritice přizamknje.