W Choćebuzu nastanjetej prawdźepodobnje dwě uniwersiće

Podstupim (dpa/SN). W Choćebuzu ma bórze móžno być, medicinu studować. Tak rěka jedyn z planow, kotrež chcedźa po wudobywanju brunicy we Łužicy zwoprawdźić. Naprawa je sobu najwažniša w zwisku ze změnu strukturow w kónčinje. Wot braniborskeho knježerstwa ­zasadźena komisija fachowcow bě so za tajke wukubłanje w druhim najwjetšim měsće Braniborskeje wuprajiła. Wukubłanje mediciny měło so poprawom ­Braniborskej techniskej uniwersiće (BTU) Choćebuz-Zły Komorow přirjadować, nětko pak hinaši koncept zdźěłuja.

Po informacijach powěsćernje dpa zamołwići tuchwilu wo druhej nošerskej strukturje rozmysluja. Wo tym rozprawješe tele dny nowina Lausitzer Rundschau. Braniborske ministerstwo za wědomosć to dotal njekomentuje. „Zamołwita ministerka nochce so do rozsuda kabineta k tomu wuprajić. Zaměr je a wostanje, kónčny koncept hač do kónca měrca wědomostnej radźe spřistupnić“, zdźěli rěčnik wědomostneho ressorta Stephan Breiding. Na doskónčnym koncepće tuchwilu hišće dźěłaja.