Po konflikće Madźarskeje dla dojednanje – tež Europeada 2024 zaručena

Berlin (SN/mb). Přihoty na přichodnu Europeadu, europske mišterstwo awtochtonych narodnych mjeńšin w kopańcy, najebać rozkoru dokoławokoło lońšeho kongresa FUEN dale pokročuja. Mjeńšinowa rada danskeje mjeńšiny, friziskeje ludoweje skupiny, němskich Sintow a Romow a serbskeho ludu běše so na wuprajenjach prezidenta FUEN Loránta Vincze, zastupjerja Madźarow w Rumunskej, postorkowała. Wón njeje jenož na kongresu FUEN w Berlinje pozdatnje přikładne demokratiske poměry w Madźarskej chwalił, ale hižo do toho jako zapósłanc europskeho parlamenta wjetšinu zapósłancow „wulku lěwicarsku ideologisku črjódu“ mjenował, dokelž su w stejišću „rozpad demokratije, prawnostatnosće a zakładnych prawow“ w Madźarskej šwikali. Konflikt wjercholeše na kongresu, jako njebě prezidij FUEN naćisk rezolucije mjeńšinow z Němskeje wo tutej tematice na dnjowy porjad wzał, dokelž bě po regulach organizacije přepozdźe dóšoł.