Olaf Scholz prócuje so z kanclerskimi rozmołwami wo direktny kontakt k wobydlerjam. Paleta temow na wčerawšim forumje w Choćebuzu bě wulka. Tři temy wosebje wusahowachu.

Choćebuz (SN). Kak móhł so problem pobrachowacych lěkarjow dla we wjesnych kónčinach přewinyć? Kajke je stejišćo zwjazkoweho knježerstwa k wójnje na Ukrainje? Kak póńdźe dale w politice ćěkancam napřećo? Tajkim a podobnym prašenjam wobydlerjow je so zwjazkowy kancler Olaf Scholz (SPD) wčera wječor w Choćebuskej měšćanskej hali stajał. We wobłuku tak mjenowanych kanclerskich rozmołwow bě nawoda zwjazkoweho knježerstwa Němskeje wčera na wopyće w druhim najwjetšim měsće Braniborskeje.

Před měšćanskej halu bě samsny čas bubnowanje a hwizdanje hwěžkow słyšeć. Zwjazk Wobydlerjow za wobydlerske prawa bě do zarjadowanja namołwjał. „Scholz dyrbi preč“, sej demonstranća žadachu. Rěčnicy mjenowachu amplowu koaliciju „njeznjesliwu“. Na plakatach něhdźe sto wobdźělnikow steješe mjez druhim: „Njejsym we wójnje z Ruskej. Kónc z wójnskej šćuwańcu EU!“