Berlin (dpa/SN). Zwjazkowy zakitowanski minister Boris Pistorius (SPD) reaguje zdźeržliwje na rozprawy medijow wo sabotažach na płunoweju pipelinow Nord Stream 1 a 2. Wuslědki rešeršow wón z wulkim zajimom na wědomje bjerje, wuswětli wón dźensa we wusyłanju Deutschlandfunk. „Dyrbimy wočaknyć, što so wobkrući. Hypotetisce komentować tuchwilu ničo nochcu“, wón podšmórny.
Kaž z rešeršow ARD, SWR a nowiny Zeit wuchadźa, su slědy ze směra Ukrainy zwěsćili. Po rozprawje tajnych słužbow je pro-ukrainska skupina za sabotažu zamołwita. Dotal pak njejsu slědźerjo žanych konkretnych pokazkow našli, w kotrym nadawku je skupina jednała. Po wšěm zdaću su wosoby wot Rostocka sem z łódźu startowali. Łódź słuša firmje ze sydłom w Pólskej. Kónc septembra zwěsćichu potom po eksplozijach štyri dźěry w płunowymaj pipelinomaj. W nowembrje su šwedske wěstotne mocy wobkrućili, zo jedna so wo sabotažu, najebać to, zo winika mjenowachu.
