Słyšenje wuběrka Sakskeho krajneho sejma wo serbskej rozprawje

Drježdźany (SN/MkWj). Wuběrk Sakskeho krajneho sejma za wědomosć, wysoke šule, medije, kulturu a turizm je so wčera ze serbskimi wěcywustojnymi zetkał, zo by jich měnjenje wo mjeztym šestej rozprawje Sakskeho statneho knježerstwa k połoženju serbskeho ludu słyšał. Serbow zastupowachu mjez druhim předsyda Domowiny Dawid Statnik, Julian Nyča­, Zuzan Šenkec, fararka Jadwiga Malinkowa, Andreas Ošika, Diana Šołćina a Franciska Grajcarekec. Sakske krajne knježerstwo ma w kóždej wólbnej dobje rozprawu wo połoženju serbskeho ludu předpołožić a ju ze serbskimi zastupnikami wuhódnoćić. Sakska woli klětu nowy krajny sejm.