Sakska wuwiwa zhromadnje z Braniborskej a ze Zwjazkom „Łužiski model dnowneje wody“. Kabinet swobodneho stata je minjeny tydźeń wobzamknył, wotpowědne zarjadniske dojednanje z woběmaj partneromaj podpisać. Bližaceho so kónca wudobywanja brunicy a změny klimy dla su kroki trěbne, zo tu njedostatk wody njezmějemy.

Drježdźany/Budyšin (SN/at). Z „Łužiskim modelom dnowneje wody“ chcedźa bytostny zakład wobhospodarjenja wody wot brunicoweho hórnistwa rysowaneho regiona w změnje strukturow tworić a jón zhromadnje wužiwać, je sakske ministerstwo za energiju, klimu, wobswět a ratarstwo wčera zdźěliło.

Hišće lětsa je wotpohladane, dźěła za model dnowneje wody zahajić. Hač do kónca 2027 maja wotzamknjene być. Po wšěm zdaću budźe do modela pře­strjeń wjace hač 5 000 kwadratnych kilometrow zapřijata. To je dobra połojca płoniny wokrjesow Budyšin, Zhorjelc, Sprjewja-Nysa, Hornje Błóta-Łužica, Dubje-Błóta a bjezwokrjesneho města Choćebuza. Předwidźane su cyłkowne kóšty 8,96 milionow eurow, z čehož Sakska něhdźe 1,34 milionow eurow přewozmje.