Dalše „twarnišćo“ Torstena Herbsta: Dwurěčne pućniki na awtodróze

Budyšin (SN/mb). Po rozrěču z krajnymaj radomaj Budyskeho a Zhorjelskeho wokrjesa pjatk připołdnju wo dalšim postupowanju za wutwar A 4 we Łužicy njeje so Torsten Herbst do swjatoka kónca tydźenja podał, ale do redakcije Serbskich Nowin (SN) přichwatał. 49lětneho parlamentariskeho jednaćela frakcije FDP w zwjazkowym sejmje wočakowaše rozmołwa z třomi generacijemi z teama našeho wječornika: Maximilian Gruber (19), Bianka Šeferowa (43) a Marcel Brauman (60). Do toho informowaše jednaćel Ludoweho nakładnistwa Domowina (LND) Syman Pětr Cyž hosća wo strukturje zawoda, kiž ma za serbske słowo bytostnu funkciju. Při tym hraje ćišćane wudaće nowin wosebje za swójby w Serbach dale wulku rólu, najebać to budu digitalne poskitki rosć.