Spektakularne zadobyće do němskeho cłowneho zarjada wobjednane

Jelenia Góra/Emmerich (dpa/SN). Po spektakularnym rubjenju wjacorych ­milionow eurow ze cłowneho zarjada w němskim Emmerichu w nowembru 2020 su dźensa w pólskej Jeleniej Górje proces přećiwo sydom wobskorženym zahajili, šěsć mužam a žonje. Jim wumjetuja čłonstwo w kriminelnym zjednoćenstwje a rubježne padustwo. Woni dyrbja po pólskim prawje z jastwom hač do 15 lět ličić, pólske krajne statne rěčnistwo do zahajenja procesa zdźěli.

Po dotalnych informacijach běchu so třo skućićeljo na wšěch swjatych 2020 do w tym času njewobstražowaneho cłowneho zarjada nad delnim Rynom zadobyli. Z profesionalnym točenskim nastrojom přełamachu murju a wurubichu trezor zarjada. Nimale 6,5 milionow eurow na to pobrachowaše. Rubizna bě zhubjena. Při rabiatnym zadobyću bě štwórty muž wobdźěleny, kiž měješe paduchow warnować.