Moskwa/Kijew/Washington (dpa/SN). Po nadpadach z trutami přećiwo objektam w Moskwje je Ruska Ukrainje z wjećbu hrozyła. Nimo prezidenta Wladimira Putina, kiž wumjetuje Kijewej teror a kiž připowědźa reakcije, přilubja tež toho dowěrnik Ramsan Kadyrow wjećbu: Nawoda ruskeje dźělneje republiki Čečeniskeje w sewjernym Kawkazu žada sej wukazanje wójnskeho prawa w Ruskej, zo móhł kraj raznišo přećiwo Ukrainje postupować. Wot Ruskeje stajnje zaso nadpadnjena Ukraina porno tomu direktne wobdźělenje za nadpady na Moskwu wotpokazuje. Wona dožiwja wšědne nadpady Ruskeje z trutami a artileriju. „Hižo bórze w pasmje wojerskeje specialneje operacije pokazujemy, što woprawdźita wjećba je“ Kadyrow rjekny. W tym zwisku hrozy wón tež zapadnej Europje z ruskimi nadpadami. Ruska móhła po jeho słowach „wo durje Němskeje a Pólskeje kłapać“, wón rjekny.