Wjerškowe zetkanje NATO we Vilniusu rěči tež wo přiwzaću Ukrainy

Moskwa (dpa/SN). Ruska je z napřećiwnymi naprawami hrozyła, dyrbjała-li ­NATO Ukrainu jako čłona přiwzać. Přistup Ukrainy by „jara negatiwne sćěhi za tak a tak hižo poł zničenu wěstotnu ­architekturu Europy měł a by Rusku ­wohrozył“, zdźěli rěčnik Krjemla Dmitrij Pjeskow wčera w Moskwje ruskim powěsćernjam. Tajka kročel by sej wot ruskeje strony „jara raznu a zrozumliwu reakciju“ žadała, Pjeskow doda.

Krjeml wě, zo do wjerška NATO dźensa a jutře we Vilniusu jara intensiwnje mjez čłonami NATO wo přistupje Ukrainy diskutuja a „zo je w tym zwisku dosć rozdźělnych měnjenjow“. „Kijewski režim“ spyta ze wšelakimi srědkami, „ćišć na wšitkich wobdźělenych wukonjeć, zo bychu w tymle prašenju swoju solidaritu demonstrowali“.

Na wjerškowym zetkanju nochce 31 čłonskich krajow NATO po informacijach němskich knježerstwowych kruhow Ukrainje žane přeprošenje za zastup do zakitowanskeje aliancy wuprajić. Za přeprošenje a konkretne kročele do směra na čłonstwo njeje hišće prawy wokomik, wčera w Berlinje rěkaše.