Wuprajenja předsydy CDU Friedricha Merza k AfD wjele diskutowane

Berlin (dpa/SN). Přesyda CDU Friedrich Merz je ze swojimi wuprajenjemi nastupajo móžne zhromadne dźěło z AfD na komunalnej runinje raznu kritiku ze swójskeje strony žnjał. Berlinski knježacy měšćanosta Kai Wegner piše internetnje: „AfD znaje jenož spřećiwjenje a pačenje. Kak měło to zhromadne dźěło wupadać? CDU njemóže, nochce a njebudźe ze stronu dźěłać, kotrejež model je hida, pačenje a wumjezowanje“. Porno tomu widźi AfD wuprajenje Merza pozitiwnje a chcyła zhromadne dźěło z CDU zmóžnić.

Merz bě w lěćnej rozmołwje ze sćelakom ZDF znowa potwjerdźił, zo njebudźe unija z AfD kooperować. Wón wobmjezowaše pak tole na „zakonjedawarske ćělesa“, potajkim na europsku, zwjazkowu a krajnu runinu. Hdyž w Durinskej krajneho radu a w Saksko-Anhaltskej měšćanostu AfD wuzwola, su to demokratiske wólby, Merz měnješe. „Tole dyrbimy tola akceptować. Wězo dyrbja w komunalnych parlamentach za pućemi pytać, kak chcyli město, kraj a wokrjes zhromadnje wuwiwać.“ Što je dokładnje z tym měnił, njeje w rozmołwje nadrobnišo rjekł.