Po Mikławšku: Elaine Jentsch, Maik Förster abo hišće dalši kandidat?

Połčnica (SN/mb). „Demokratija je žiwa wot sobučinjenja“, steji jako hesło na internetnej prezentaciji 58lětneho Maika Förstera, wokrjesneho radźićela CDU z Połčnicy. To tež w swojej stronje chutnje bjerje – a tohodla so nětko wo naslědnistwo Alojsa Mikławška požada. Förster chce wólbny wokrjes Budyšin 2, do kotrehož słušeja gmejny zarjadniskeho zwjazka Při Klóšterskej wodźe, při klětušich wólbach do krajneho sejma za křesćanskich demokratow přećiwo AfD zakitować. Faktisce matej jenož tutej stronje w našim regionje wuhlad na wuspěšne direktne kandidatury, zastupjerjo druhich stron trjebaja za mandat w sakskim parlamenće dobre městno na krajnej lisćinje swojeje strony.