Kamjenica (dpa/SN). Podobnje cyłoněmskemu trendej su ličby bjezdźěłnych tež w Sakskej stupali. Po słowach nawjednika sakskeje regionalneje direkcije Zwjazkoweje dźěłoweje agentury Klausa-Petera Hansena tute wuwiće na spočatku prózdnin a hladajo na cyłkownu flawtu hospodarskeje konjunktury cyle njewočakowane njeje. „Situacija wostanje nadal napjata. Woteběrace ličby bjezdźěłnych najprjedy raz njewočakujemy“, wón doda. Nimale 132 000 ludźi běše ke kóncej julija bjez dźěła. To je ně­hdźe 13 000 wjace hač loni. Kwota bjezdźěłnych je z tym na 6,2 procentaj postupiła. „Stupace ličby pak zwisuja tež ze zakónčenjom šulskich a dualnych wukubłanjow k spočatkej lětnich prózdnin. Wulka ličba młodostnych so w tutym času nachwilnje jako bjezdźěłna přizjewi“, rozłoži Hansen. Nimo toho mnoho předewzaćow w dowolowym času mjenje ludźi přistaja. „Štož nam wosebje napadnje, je wulke woteběrace mnóstwo krutych přistajenjow we wikowanju a na twarnišću“, Hansen wuzběhny. Najniše kwoty bjezdźěłnosće ma Rudnohórski wokrjes ze 4,9 procentami.