Wiesbaden (dpa/SN). Ličba předewzaćelskich insolwencow w Němskej spochi přiběra. W juliju je nimale štwórćina (23,8 procentow) firmow wjace próstwu wo rjadowanu insolwencu stajiło hač lěto do toho. To zdźěli zwjazkowy statistiski zarjad minjeny pjatk na zakładźe dotal předležacych datow. Tak je wuwiće minjenych lět dale postupowało, statistikarjo zwěsćeja. Hižo w juniju běchu rozrost plajtow wo 13,9 procentow zličili. Předewzaća maja konjunkturne wosłabjenje, wysoke kóšty energije a materiala kaž tež přiběrace kóšty kreditow w zwisku z wysokimi danjemi za hłowne přičiny insolwencow. Fachowcy pak přiwšěm wo žołmje plajtow rěčeć nochcedźa.

Najwjace insolwencow mějachu we wobłukomaj wobchad a składowanje. Slědowachu hospodarske posłužby kaž firmy za dźěło na čas. Najmjenje plajtow su pola energijowych zastaraćelow zličili.