Zaćišće z kolesowanja na spočatku lětušeho Serbskeho ewangelskeho cyrkwinskeho dnja w Slepom

Slepjanska wosada ze swojimi wosom wsami Slepo, Trjebin, Rowno, Mułkecy, Miłoraz, Brězowka, Dźěwin a Lěsk je kulturny region. „Wona je jónkrótna ze swójskej serbskej rěču, narodnej drastu, wjesnej architekturu a pěstowanjom tradicijow. Bychmy sej dospołnu wosadu wotkryć chcyli, bychmy za to cyły dźeń trjebali“, podšmórnje Jadwiga Malinkowa, wot lěta 2014 fararka w Slepom, na spočatku kolesowanja. Tute bě wona hromadźe z rěčnej motiwatorku Julianu Kaulfürstowej jako zazběh 77. serbskeho ewangelskeho cyrkwinskeho dnja organizowała.

Ze Slepoho podachu so po historiskim nasypje w Starej Slepjanskej hatnej kónčinje do Trjebina na Šusterec statok, wottam do Trjebinka na kromu Wochožanskeje brunicoweje jamy a dale do Miłoraza na pohrjebnišćo a do wsy. Něhdźe dwaceći zajimowanych z Delnich Sulšec, Budyšina, Bukec, Rakec a Zhorjelca bě do pedalow teptało.