Nowa Forsa-studija pokaza na sylne polarizowanje towaršnosće

Berlin (dpa/SN). Zo so problemy w Němskej kopja, je wočiwidne. Wupad wučby w šulach, ze zaměstnjenjom ćěkańcow přežadane komuny a wěčne doby čakanja na terminy w zarjadach – wućah to z problemoweje lisćiny stata. Wšitke tute straty maja wězo wuskutki na spokojnosć ludźi z dźěłom knježerstwa. W nowym naprašowanju, kotrež wozjewi institut Forsa wutoru, pokazachu so katastrofalne sćěhi: Jeničce 27 procentow ludnosće w Němskej posudźuje stat jako swojim nadawkam wotpowědnje kmany. 69 procentow na tamnym boku atestowaše wyšnosći přežadanosć. Studiju do nadawka dał je Zwjazk němskich zastojnikow (dbb). Předsyda Ulrich Silberbach pomjenowaše njedawno wozjewjene ličby „wostrózbnjace“. Při tym so tež njeboji zwjazkoweho kanclera Olafa Scholza (SPD) do kritiki zapřijeć: „Tam sedźi něchtó w kanclerowym zarjedźe, kiž je prajił: ,Štóž pola mje nawod skaza, je tež dóstanje‘. Tole pak njejsu ludźo woči­widnje hišće tak dožiwili.“