Zwjazkowy sejm wuradźuje wo financnym etaće Němskeje za lěto 2024

Berlin (dpa/SN). Zwjazkowy financny minister Christian Lindner (FDP) je dźensa w zwjazkowym sejmje naćisk etatoweho plana za lěto 2024 předstajił. Po tym chce zwjazkowe knježerstwo klětu 445,7 miliardow eurow wudać, wjace hač 30 miliardow mjenje hač lětsa. Lindner chce 16,6 miliardow eurow nowych kreditow brać, lětsa bjerje stat 30 miliardow. Po tutym puću chcedźa w zakładnym zakonju zakótwjene borzdźidło zadołženja dodźeržeć, kotrež předwidźi jenož jara wobmjezowane nowe kredity.

Lindner bě hižo do wuradźowanja rjekł, zo je zwjazkowy etat 2024 jenož ­započatk napinanjow lutowanja po puću k wurunanju etata. Stat dyrbjał po přidatnych wudawkach koronapandemije a energijoweje krizy dla zaso nawuknyć, z pjenjezami ludźi wuńć. Wšitke wobłuki nimo zakitowanskeho ministerstwa maja zawjazki lutowanja spjelnić.