Dźensa, 11. septembra, je tomu 50 lět, zo je wójsko w Chile tři lěta do toho demokratisce wuzwolene knježerstwo socialistiskeho prezidenta Salvadora Allendy namócnje powaliło. Allende je sej samsny dźeń w prezidentskim palasće La ­Moneda žiwjenje wzał, po tym zo běchu lětadła twarjenje bombardowali a prěni wojacy so do njeho zadobyli. Wojerska junta pod nawodom generala Augusta Pinocheta je na to w Chile brutalnu a krawnu wojersku diktaturu natwariła, kotraž traješe hač do 11. měrca 1990. Hnydom po wojerskim puču zahaji wójsko brutalne přesćěhowanje wšeje opozicije. Tysacy přiwisnikow Allendy zajachu, krjudowachu a morichu. Po wšelakich trochowanjach su znajmjeńša 5 000 ludźi morili. Wjace hač 10 000 zajatych je přeco hišće zhubjenych. Pinochet je lěta 2006 w Chile 91lětny zemrěł, bjez toho zo by so hdy za swoje złóstnistwa zamołwić dyrbjał.