Stepanakert (dpa/SN). Wójsko Azerbajdźana je dźensa konfliktnu kónčinu ­Hórski Karabach na juhu Kawkaza znowa z raketami nadběhowało. Při tym su tež ciwilne objekty trjechili, armeniska powěsćernja Armenpress zdźěla. Armenske wojerske jednotki kónčinu zasakle zakituja, dźensa zdźělichu. Bywša sowjetska republika Azerbajdźan bě předwčerawšim, wutoru, wulku wojersku akciju k zdobyću Hórskeho Karabacha zahajiła. Dotal je znajmjeńša 20 wobydlerjow žiwjenje přisadźiło. Awtoritarnje knježacy mócnar Azerbajdźana Ilham Alijew je wonkownemu ministrej USA Antonyjej Blinkenej telefonisce rjekł, zo chcył wojerske zasadźenje hakle skónčić, hdyž su Armenjenjo brónje złožili.