Zwjazk wokrjesow warnuje před přežadanjom komunow ćěkancow dla

Zły Komorow (dpa/SN). Wokrjesy Braniborskeje maja mjezu poćežowanja při zaměstnjenju ćěkancow za docpětu a žadaja sej raznišu azylowu politiku. „Jeli so ničo njezměni, njejsmy bórze wjace kmani, ćěkancow přiwzać“, rjekny předsyda zwjazka wokrjesow, krajny rada Siegurd Heinze powěsćerni dpa. „Potom twarimy zaso stanowe lěhwa a kontejnerowe sydlišća abo wužiwamy sportowe hale.“ Wón rěči wo jara napjatym połoženju a wo woteběracej akceptancy mjez wobydlerjemi. „Dołho to wjace njewudźeržimy.“

Bjezstronski krajny rada wokrjesa Hornja Sprjewja-Łužica nima jenož zaměstnjenje za wulki problem. „Naše najwjetše problemy su nimo toho kapacity w dźěćacych přebywanišćach, šulach a lěkarske zastaranje“, Heinze rjekny. Nic naposledk je dale a wjace njepřewodźanych dźěći a młodostnych mjez ćěkan­cami. Městna za nich su tak derje kaž wučerpane. „Ze stron Zwjazka so za tutón problem scyła njezajimuja.“