Budyšin/Berlin (SN/mb). Wulki bě loni nazymu šok we Łužicy, hdyž je zwjazkowe knježerstwo wšu swoju dźěławosć za wutwar awtodróhi 4 cofnyło – a tohodla je poselstwo ćim lěpše, kotrež je Budyski zapósłanc krajneho sejma Marko Šiman (CDU) wčera z dwuhodźinskeje „dźěłoweje rozmołwy“ w zwjazkowym minister­stwje za digitalne a wobchad do swojeje domizny přinjesł: Woni z přetorhnjenym planowanjom nětko zaso pokročuja. To je parlamentariski statny sekretar při ministerstwje Michael Theurer (FDP) delegaciji Hornjołužiskeje iniciatiwy přede­wzaćelow wobkrućił. Załoženje tuteje iniciatiwy je Šiman před pjatnaće lětami nastorčił, jej mjeztym zastupjerjo 35 firmow přisłušeja. Wčera w Berlinje běchu nimo Šimana tež Dirk Petasch z blidarnje we Wulkej Dubrawje, Silvio Buchhorn („SLB Stadt- und Landbau Budyšin“) a Peter Boxberger, inženjer za měrjenje z Kamjenca, přitomni, kotřiž zdobom rjemjesło, wjetše zawody regiona a samostatnych reprezentuja.