EU w prašenju podpěry na dobro Palestinjanow njepřezjedna

Brüssel (dpa/SN). W Europskej uniji je zwada wo tym wudyriła, kak prawje reagować na nadpad islamistiskeje Hamas na Israel. Prezident Rady EU Charles Michel kritizowaše wčera wječor z jasnymi słowami rozsud Němskeje, financnu pomoc na dobro zhromadneho dźěła z palestinskimi kónčinami nachwilnje přetorhnyć. Belgičan warnowaše, zo móhła Hamas kónc nuznje trěbneje wuwićoweje a humanitarneje pomocy za to wužić, napjatosće a hidu dale přiwótřić.

Wulke napjatosće knježachu samsneho problema dla tež we wobłuku komisije EU pod nawodom Ursule von der Leyen. Zarjad dyrbješe wčera wječor samo připowědźenje nastupajo kónc dalšeje wuwićoweje pomocy relatiwizować. Do toho bě zamołwity komisar Oliver Varhelyi připowědźił, wšitke přepokazanki hnydom přetorhnyć. Pječa bě Madźar Varhelyi rozsud swojowólnje a bjez dorěče wozjewił. Poprawom chcychu najprjedy wšitke čłonske staty informować.