Prof. Wornar: Rěčne kmanosće serbskich abiturientow „jara hubjene“

Lipsk (SN/mb). Je to wukubłanju serbskeho wučerstwa na škodu, zo je so Institut za sorabistiku na Lipšćanskej uniwersiće zapadoeuropskim mjeńšinowym rěčam wotewrěł? Haj, praješe towarstwo „Sorabija“ serbskich studentow, kotřiž su so z listom na uniwersitu, Domowinu a sakske knježerstwo wobroćili (Serbske Nowiny rozprawjachu). Ně, praji jednaćelski direktor instituta a zamołwity slědźenišća za mjeńšinowe rěče prof. Edward Wornar w rozmołwje z našim wječornikom. „Smy Słowjenjo, ale tež mjeńšina“, a tohodla „nam wulke słowjanske rěče wjele pomhać njemóža, dokelž njejsu wohrožene“, wobkrući swoju poziciju. Ale „wolóžuje, hdyž słyšiš, zo Irčan abo Walizičan swoju rěč z jendźelskimi słowami dopłatuje, kaž my z němskimi.“ Nimo toho „nawuknjenje druheje mjeńšinoweje rěče studentow wučerstwa scyła njepotrjechi a studentow sorabistiki jenož, hdyž to chcedźa“, tak Wornar.