Wowčerjo aktualny namjet zwjazkoweje ministerki raznje wotpokazuja

Berlin (SN/mb). Běše wčera dźeń přewróta wobchadźenja z wjelkom? Zwjazkowa ministerka za škit wobswěta Steffi Lemke (Zeleni) je skónčnje konkretny namjet předstajiła: Směš w přichodźe wjelka wottřělić, kiž w běhu 21 dnjow we wobkruhu tysac metrow tam přebywa, hdźež bu na přikład wowca storhana. Njetrjebaš hižo analyzu DNA dočaknyć. Zamołwity zarjad móže to w regionach wuwzaćnje dowolić, hdźež je hižo wosebje wjele škodow. Dalše wuměnjenje je, zo je wjelk „přicpěwajomne naprawy za škit stadła“ přewinył a pastwinske zwěrjata morił. Lemke chce swój namjet do wothłosowanja ze zwjazkowymi krajemi zapodać a so wobzamknjenja na konferency ministrow za škit wobswěta kónc nowembra nadźija.