Opozicija wěri do toho, zo su wólby parlamenta w Pólskej dobyli

Waršawa (dpa/SN). Lědma hdy swjeća ludźo druhe městno tak, kaž tuchwilu opozicija knježerstwa w Pólskej. „Dźensa sym najzbožowniši čłowjek cyłeho swěta“, wuzběhny pólski nawoda opozicije Donald Tusk wčera wječor we Waršawje. „Pólska a demokratija stej dobyłoj. Nětko je kónc knježerstwa PiS.“ Naciolno-konserwatiwna strona Prawo a sprawnosć (PiS) steješe w Pólskej cyłkownje wosom lět na čole knježerstwa. Po wólbach parlamenta minjeny kónc tydźenja su strony opozicije nadźije połni, zo su wjetšinu hłosow wolerjow dóstali, tak zo móža nowe knježerstwo wutworić. „Pólska je nětko wróćo w Europje“, podšmórny wčera tež Robert Biedron ze zwjazka Lěwicy.