Marko Šiman jako direktny kandidat za wólby krajneho sejma nominowany
Hrubjelčicy (SN/at). Serb ma šansu, po towaršnostnym přewróće 1989/1990 do stawiznow Sakskeho krajneho sejma zańć. Tuchwilu přisłušeja wot 1. wólbneje periody Andrea Dombois, dr. Matthias Rößler a Marko Šiman (wšitcy CDU) Sakskemu krajnemu sejmej. Jako jenički z nich Marko Šiman klětu 1. septembra k wólbam sakskeho parlamenta znowa nastupi. Ze 100 procentami wotedatych płaćiwych hłosow je jeho 37 přitomnych čłonow CDU wčera na sobustawskej zhromadźiznje wólbneho wokrjesa 56 w Hrubjelčicach jako direktneho kandidata nominowało.
„Wotum čłonow CDU je sylny, mje jako direktneho kandidata wólbneho wokrjesa 56 nominować, a podpěruje mój rozsud znowa kandidować“, nazhonity politikar po wólbach přizna. Žana dalša kandidaturu přizjewjena njebě. Mocy zjednoćić, wólbny bój budźe napinacy dosć. Na to je wokrjesny předsyda Udo Wićaz přitomnych wčera wospjet dopominał.
