Drježdźany (dpa/SN). Wjele traktorow a słyšomny protest: Ratarjo su wčera ­dopołdnja ze swojimi jězdźidłami k Sakskemu krajnemu sejmej dojěli, zo bychu přećiwo zapozdźenemu wupłaćenju srědkow EU protestowali. Z trubjenjom a plakatami woni swój hněw zwuraznichu. Po informacijach organizatorow bě 350 traktorow do sakskeje krajneje stolicy dojěło. Něhdźe 500 ratarjow so na protestnej akciji wobdźěli. Wokoło krajneho sejma dóńdźe k wobchadnym ­haćenjam. „To je jenož kónčk lodowca“, rjekny Marc Bernhardt, rěčnik towarstwa „Kraj wutworja zwisk“. Burja njejsu jenož pjenjez z Brüssela dla přijěli. Bernhardt rěčeše wo tójšto wopačnych rozsudach minjenych lět. Minjeny pjatk bě ratarske ministerstwo zdźěliło, zo njemóže kompjuterowych problemow dla ratarske spěchowanske srědki EU kaž zwučene w decembru wupłaćić. Město toho chcedźa 241 milionow eurow 7 000 zawodam najpozdźišo kónc februara přepokazać. Ministerstwo argumentuje, zo je Europska unija směrnicy ratarskeje politiki ­zasadnje změniła a zo nimaja dosć fachowcow, kotřiž móhli kompjuterowu techniku wotpowědnje přestajić.