Designowana načolna kandidatka Lěwicy Carola Rackete redakciju wopytała

Budyšin (SN/at). Jeje wopyt w redakciji našeho wječornika bě krótki. Za to pak wopokaza so paleta zhromadnje rozjimanych temow jako přewšo wobšěrna.

„Diskusije z ludźimi bjez němskeho pasa su mi w tym wobkrućili poskitk Lěwicy přiwzać. Jich je 14 procentow, kotřiž njesmědźa w Němskej wolić“, rjekny Carola Rackete, designowana načolna kandidatka Lěwicy za klětuše Europske wólby. Jako kapitanka bě z łódźu „Sea-Watch 3“ 2019 ćěkancow w nuzy ze srjedźneho morja wuchowała a do wěsteho italskeho přistawa Lampedusa přinjesła. Rozestajenje z tehdyšim italskim ministrom nutřkowneho Salvinijom je skrućena přetrała. Po třiměsačnym aresće je jej sudnistwo swobodu wróćiło. Wot toho časa so medije za nju zajimuja. To a němski pas rěkatej za nju „měć priwileg, kotryž chcyła jako europska zapósłanča wužiwać“.