WHO žada sej humanitarnu pomoc za ciwilistow w Gazaskim pasmje
Gaza (dpa/SN). Swětowa strowotniska organizacija WHO je znowa „grawoćiwe poměry“ w najwjetšej chorowni Gazaskeho pasma šwikała. W chorowni Schifa je wjace hač 2 000 ludźi, mjez nimi něhdźe 600 pacientow a 1 500 wuhnatych, piše WHO dźensa na internetnej platformje X, powołujo so na palestinske strowotniske ministerstwo pod kontrolu Hamas. Po tym njedóstanu pacienća žanu dialyzu wjace, ćěšenki leža w operaciskej žurli, dokelž stacija za nowonarodźenych hižo njedźěła.
„Trajace bombardowanja a wojowanja w kónčinje su kritiske połoženje dale přiwótřili. Ličba smjertnych woporow spochi přiběra“, piše generalny sekretar WHO Tedros Adhanom Ghebreyesus w swójskim přinošku. Wón žada sej hnydomny přiměr. Gebreyesus spřećiwja so twjerdźenju Israela, zo je Hamas dodawanje bencina za generatory chorownje ze stron Israela wotpokazała a zo ma Hamas pod chorownju centralu rozkaznistwa.
