W sejmje tójšto podpěry za mjeńšinowe rjadowanja w mjenowym prawje

Berlin (SN/at). Zwjazkowy sejm je so wčera wječor w prěnim wuradźowanju z naćiskom zakonja wo změnje prawa mjena mandźelstwa a ródneho mjena zaběrał. Z nim zwjazuja Serbja, Danojo a Frizojo nadźiju, swójske zdźědźene mjenowe tradicije hamtsce wobkrućić dać.

Zwjazkowy minister justicy, Marco Busch­mann (FDP), rěčeše w swojim zawodźe wo „dobrej powěsći“: Wšako ma zakoń „cil swobodnišeho, modernišeho a tolerantnišeho mjenoweho prawa“. Wón wuzběhny, zo „dyrbi so knjeni Kralowa w Němskej ,Frau Krahl‘ mjenować“. Runje tak naliči přikładaj Frizow a Danow, kotrejž mjenowej tradiciji hišće njewotpowědujetej. Minister Buschmann dźakowaše so zapósłancej Torstenej Herb­stej, kotryž bě jeho jako prěni na serbsku problematiku skedźbnił, toho koleginje Gyde Jensen (wobaj FDP) a zapósłancej SSW Stefanej Seidlerej, „kotryž so zastojnstwa dla angažowaše. Je tuž dobra powěsć za narodne mjeńšiny, zo móža swoje mjenowe tradicije dale wjesć.“ Busch­mann nadźija so přichileneje zaběry we wuběrkach z naćiskom zakonja.