Na nazymskim posedźenju je Rada Załožby za serbski lud wčera w Podstupimje hospodarski plan załožby za lěto 2024 wobzamknyła. Znowa zaběraše so gremij z połoženjom w Ludowym nakładnistwje Domowina.

Podstupim (SN/at). W bugdetowym planje Załožby za serbski lud za lěto 2024 su wudawki nimale 33,2 milionaj eurow předwidźane. To je załožbowa rada wčera schwaliła. Tam zapřijate su zdobom projekty z wobłuka změny strukturow runje tak kaž předfinancowanja za „Serbski centrum wědy na Lawskim arealu“. Cyły plan pak je znowa wotwisny wot etatowych wobzamknjenjow zwjazkoweho sejma a krajneju parlamentow Sakskeje a Braniborskeje. Po słowach předsydy załožboweje rady, Marka Kowara, su so nowe radźićelki a „nowi radźićeljo prěni raz z wobšěrnym hospodarskim planom rozestajeli. Dźakowano płaćiwemu financnemu zrěčenju je srjedźodobne financowanje aktualnych strukturow hač do 2025 tež w padźe wyšich tarifowych stopnjowanjow zaručene.“