Za sakske poměry je naćisk zakonja wo změnje krajneje wustawy, kotryž su frakcije koalicije CDU, Zelenych a SPD wčera do sejma zapodali, mała rewolucija: za wjac direktneje demokratije.

Drježdźany (SN/mb). By-li wobsah tutoho zakonja hižo w lěće 2003 płaćiwy był, by ludowe požadanje „Přichod trjeba šulu“ wuspěšne było. Tehdom su 363 000 podpismow za zdźerženje wjesnych šulow a małe rjadownje zběrali - přemało po sakskej wustawje, w kotrejž je 450 000 předpisanych. Tohodla njebě k ludowemu wothłosowanju dóšło. To běše tež serbskim prócowarjam bolostna poražka, wšako njeje serbski lud jenož srjedźnej šuli w Chrósćicach a Pančicach přisadźił, ale tež prawo na małe serbske rjadownje. Po aktualnym naćisku je hišće podpěra šěsć procentow wólbokmanych trěbna. Jich běchu při poslednich wólbach krajneho sejma 3,3 miliony, potajkim by 200 000 podpěraćelow dosahało.