Serbski sejm a załožba „Slavonic Europe“ na rozpuću

Njebjelčicy (SN/mb). Hač do zašłeho pjatka běše David Chmelík, załožer a prezident załožby „Slavonic Europe“, wažny podpěraćel Serbskeho sejma. Nětk pak je kooperacija nahle zakónčena, kaž našemu wječornikej zapósłanc sejma Měrćin Krawc wobkrući. Dwě lěće su hromadźe „rjane a wulkotne wěcy zeskutkownili“. Tola je so wukopało, zo je „strukturelne wašnje dźěławosće“ Chmelíka a Serbskeho sejma „přerozdźělne“, tak Krawc: „Smy na konsens wusměrjeni“, to je Chmelíkej druhdy „přepomału“ było. Jeho „mjezynarodna syć za słowjanske zhromadne dźěło“ ze sydłom w Brüsselu běše Serbskemu sejmej hustodosć poboku: Hač dźěše wo wuprawu z Łužicy do regiona němskeho zhromadźenstwa we wuchodnej Belgiskej abo wojowanje wo připóznaće Serbow jako indigeny lud – přeco běše Chmelík prezentny.