Na zarjadowanjach Domowiny simultane přełožowanje zaručene

Budyšin (SN/at). W Sakskej wola 1. septembra nowy krajny sejm. Horca doba wólbneho boja je so mjeztym zahajiła. To je sobu na tym zwěsćić, zo so kandidatki a kandidaća na mnohich zarjadowanjach wolerkam a wolerjam předstajeja. Krajna centrala za politiske kubłanje w kóždym wólbnym wokrjesu forum z direktnymi kandidatami wuhotuje.

Zazběh w Budyskim wokrjesu je zarjadowanje za wólbny wokrjes 53 dnja 30. julija w Kamjenskim Flairhotelu na Zapadnej. Budźe zajimawe, kak kandidatka CDU Elaine Jenčec rozestajenje ze sobupožadarjemi zmištruje. Wšako chce wona jako naslědnica Alojsa Mikławška do krajneho sejma zaćahnyć a mandat CDU zakitować. Z Jurjom Pětrom Bulankom nastupi we WK 53 Serb za SPD.