Na konferency w Berlinje wo „kontrolnych mechanizmach“ wuradźowali

Berlin (SN/mb). Tak mjenowana „Implementěrowaca konferenca“ zwjazkoweho ministerstwa nutřkowneho so jónu za lěto wotměwa, wčera zaso w hybridnej formje, to rěka w Berlinje a online. Štož jara abstraktnje klinči, běše w běhu štyrihodźinskeho wuradźowanja tola dosć konkretne: Wobdźělnicy su so na přikład z tym zaběrali, kak móhło so radźić, europsku chartu za regionalne a mjeń­šinowe rěče zwoprawdźeć a kotrym bracham maja wotpomhać. Feliks Ričel, referent Domowiny za dźěło w gremijach a ministerielne naležnosće, sej waži, zo sedźa zastupjerjo krajow, Zwjazka a europskeje runiny za jednym blidom. Ze stron Serbow staj so nimo njeho předsyda Domowiny Dawid Statnik a hłowna jednaćelka třěšneho zwjazka Judit Šołćina wobdźěliłoj.