Běła Woda (CK/SN). Na čole třećeho najwjetšeho města Zhorjelskeho wokrjesa budźe w přichodźe žona stać: W druhim wólbnym kole je so wčera 42,8 procentow wolerjow za Katju Dietrich jako nowu wyšu měšćanostku rozsudźiło. Čłonka SPD, kotraž hakle dwě lěće w měsće bydli a w Sakskej agenturje za strukturne wuwiće dźěła, bě so swojeje funkcije předsydki měšćanskeho zwjazka strony wzdała a jako njewotwisna kandidatka nastupiła. Wona naslěduje Torstena Pötzscha (wolerske zjednoćenstwo „Klartext“), kiž po dwěmaj wólbnymaj periodomaj ze strowotnych a wosobinskich přičin hižo kandidować nochcyše.

Kandidatka „Klartext“ Swantje Schneider-Trunsch (37,3 procenty) je drje hišće w prěnim wólbnym kole 1. požnjenca z 35,3 procentami najwjac hłosow dóstała. Dokelž njeje nichtó absolutnu wjetšinu docpěł, dyrbjachu Běłowodźenjo druhi raz wolić. Tehdom je 30 procentow kandidata AfD Davida Kreiselmeiera woliło, wčera pak jenož hišće 19,9 procentow. 12 772 ludźi měješe prawo, so na tutych wólbach wobdźělić. Nimale połojca (47,7 procentow) je prawo wužiła.