Ewaluacija kampanje za našu rěč wujewja wulke rezerwy za wšědny dźeń

Drježdźany/Budyšin (SN/mb). Klětu w februaru budźe tomu pjeć lět, zo je w Budyskim Serbskim domje sakska ministerka za kulturu a turizm Barbara Klepsch (CDU) kampanju „Sorbisch? Na klar.“ oficialnje startowała. Zawčerawšim je so w Drježdźanach přirada z dotalnymi wuslědkami zaběrała (hlej powěsć we wčerawšim wudaću SN). W přiradźe skutkuje tež jednaćel Ludoweho nakładnistwa Domowina Syman Pětr Cyž jako poradźowar, kiž je kampanju tehdom koncipował. „Sorbisch? Na klar.“ je wurostł z druheho „plana naprawow k pozbudźowanju a wožiwjenju wužiwanja serbskeje rěče“, z kotrymž chcedźa po aktualnym koaliciskim zrěčenju pokročować.