30. nowembra 2024 smy zhubili muža, kotryž je ze swojej dokładnosću a pilnosću wažne strony serbskeho a łužiskeho stawiznopisa znosył. Zemrěł je dr. Erhard Hartstock, rodźeny 1939, mój bywši sobušuler na Serbskej wyšej šuli. Nimale bjez wšěch znajomosćow serbšćiny přišedši je tam w poł lěta trajacym krótkokursu pilnje, zaměrnje a wuspěšnje jemu pozdźišo lubu serbsku rěč nawuknył, kaž nimale wšitcy sobušulerjo w našej rjadowni B 2.

Studował je na Lipšćanskej uniwersiće, hdźež zdoby sej 1969 titul doktora filozofije. Zanuri so do archiwnistwa a běše wot lěta 1969 hač do 1975 nawoda Budyskeho Statneho filialneho archiwa a po tym hač do swojeho wuměnka, kotryž bu jemu kaž mnohim z mojeje generacije nanuzowany, wotrjadnik Drježdźanskeho statneho archiwa. Dokelž so rady pjera jimaše, bu 1988 komisariski šefredaktor Archiwnych zdźělenkow. Po přewróće so politisce angažowaše, „zo njebychu so stawizny skepsali“, kaž rjekny. To naju znowa hromadźe zwjedźe, w dźěłowym kruhu za wědomosć a kulturu opoziciskeje frakcije PDS w Sakskim krajnym sejmje.