Telewizijne rozestajenje mjez kanclerskimaj kandidatomaj SPD a CDU/CSU
Berlin (dpa/SN). Dwaj tydźenjej do wólbow zwjazkoweho sejma staj zwjazkowy kancler Olaf Scholz (SPD) a kanclerski kandidat unije Friedrich Merz (CDU) kontrowersnje wo migraciskej politice a wo wobchadźenju z AfD diskutowałoj. Při prěnim z cyłkownje dweju telewizijneju duelow běštaj politikarjej w prašenjach socialneje, hospodarskeje a financneje politiki dospołnje rozdźělneho měnjenja. Po měnjenju přihladowarjow debaty bě duel, kiž stej sćelakaj ARD a ZDF wčera wječor live wusyłałoj, „bjez jasneho dobyćerja“.
Scholz Merzej znowa wumjetowaše, zo je přilubjenje nastupajo AfD zranił, jako swój pjeć dypkow wopřijacy plan k migraciji z hłosami AfD přesadźi. Scholz předsydźe CDU bjeze wšeho přicpěwa, zo po wólbach zwjazkoweho sejma koaliciju z AfD wutwori. „To je moja chutna starosć“, Scholz rjekny. Merz tole wuraznje wotpokaza. „Njebudźe nihdy zhromadneho dźěła“, wón rjekny. Mjez AfD a uniju CDU/CSU su we wěcownych prašenjach hoberske rozdźěle, praji předsyda CDU.
