Přichod słowjanskeho hrodźišća w Radušu zwady mjez městom Wětošowom a nowym wotnajerjom Davidom Chmelíkom dla na hračkach steji. Póndźelu měšćanscy radźićeljo wo tym rozsudźa.

Wětošow (SN/mb). Dojednanje mjez Wětošowom a Davidom Chmelíkom, załožerjom a prezidentom załožby Slavonic Europe, běše wjelelubjace: Město by z tym swoje lětne pjenježne winowatosće we wysokosći 300 000 eurow wotbyło a zdobom nowe perspektiwy za cyłu Łužicu tworiło (Serbske Nowiny wospjet rozprawjachu). Najebać to, zo rodźeny Čech Chmelík, kiž wot młodosće sem w Němskej bydli, sydom rěčow wobknježi, so partneraj tuchwilu njerozumitaj. Město jemu wumjetuje, zo njeje dotal měsačny najenski pjenjez zapłaćił a sobudźěłaćerjo su so w anonymnym zjawnym lisće hóršili, zo mzdu dóstali njejsu. Chmelík praješe, zo jemu hišće lubjene zrěčenje po herbskotwarskim prawje pobrachuje, bjez kotrehož nima šansu na trěbny kredit. Nimo toho ma sumu 6 000 eurow, kiž ma městu měsačnje płaćić, za přewysoku, zo by so wobhospodarjenje radźiło.