Štwórtk, 6. małeho róžka, zwostanje nam jako čorny dźeń w pomjatku. Dóstachmy bolostnu powěsć, zo je Andreas Ošika – naš jednaćel, kolega a mnohim z nas tež přećel – 46lětny zemrěł. Dźeń do toho smy z nim hišće dźěłali, protyku za nowe lěto nadźěłali, bjesadowali … To nětko ženje wjace njebudźe. Přihotował bě so na sportowe wužadanje, za kotrež je tež srjedu wječor trenował. Kaž činješe tole ze zapalom a z jasnym cilom před wočomaj – chcyše połmarathon zmištrować –, wěnowaše so tež naležnosćam Serbskeho šulskeho towarstwa, kotrehož jednaćel wón wot lěta 2022 běše. Běše rady a z wjeselom žiwy. To so nic naposledk w tym jewješe, zo běše jemu dobra mjezsobnosć ludźi a z tym dobra atmosfera – tež při wobchadźenju z problemami – wažna. Z toho smy stajnje profitowali.
Prjedy hač je do zarjada SŠT přišoł, dźěłaše mjez druhim w Sakskim centrumje epilepsije w Radebergu, w klóštrje Marijinej hwězdźe w Pančicach-Kukowje a w Zwjazku Carity Hornja Łužica we wodźacych funkcijach.
