Weronika ŽurowaNjedawno je Domowina wozjewiła, zo wuwoła nowe myto: Myto za hospodarstwo. To sej chwalu a sej přeju, zo je wone regionalnym a wosebje serbskim předewzaćam motiwacija, serbskosć hajić a so sebjewědomje k njej wuznawać. Bjez toho zo bych konkretne modality wupisanja znała – na tych so hišće dźěła – zeschadźa mi spontanje myslička, komu bych tajke myto popřała. Swěru hesłu „widźomna serbskosć“ pohladach do interneta, kak so naše regionalne přede­wzaća tam – nic jenož nam domoródnym, ale tež našim hosćom – prezentuja. Jako prěnje wěnowach so gastronomiskemu wobłukej. Hdyž du do hosćenca, wšak wobhladam sej do toho rady na internetnej stronje, na čo směm so wjeselić. Bohužel njejsym w cyłym Budyskim wokrjesu ani jenički hosćenc našła, kiž by so online nimo němčiny tež serbsce prezentował. Catering móže druhdy narunanje za wopyt hosćenca być. A hlej, mjez łužiskimi poskićerjemi nańdźech akuratnje jednoho: Dinarjec swójbne předewzaće w Nowoslicach.