Ochranowske wolejfantki –

Viktoria Worklecy 1:3

(25:8, 24:26, 22:25, 21:25)

Za Viktoriju Worklecy běchu zasadźene: Maika Dźisławkec, Diana Hajnec, Xenia Koberec, Marina Köhler, Klara Kralec, Constance Pötschke, Anja Šmidtowa, Jana­ Žurowa

Kónc tydźenja bě sej prěnje žónske wolejbulowe zastupnistwo Viktorije Worklecy na wonkownu hru do Ochranowa dojěło. Kontrahent steješe w tabulce před Worklečankami.

Prěnja sadźba započa so na dobro hosćićelkow. Přez suwerene a spěšne dypki sej za sobu jasny předskok zaručichu. Z krótkej hrajnej přestawku spytachu Worklečanki při stawje 1:8 hosćićelki z rytmusa přinjesć. Tola to so jim njeporadźi, Ochranowske wolejfantki wobstajnje dale dypki zběrachu. Hosćo drje sej jednotliwe dypki wuwojowachu, tola při dypkowym stawje 4:20 mějachu znowa wo přetorhnjenje prosyć. Domjace zastupnistwo sadźbu jasnje dominowaše a zakónči ju po jenož 13 hrajnych mjeńšinach 25:8.